Qaraqalpaqstan awıl xojalıǵı hám agrotexnologiyalar institutı Málimleme-resurs orayı baslaması menen "Ózbekstan - kitapqumarlar mákanı" súreni astında keń kólemli kitap kórgizbesi hámde "7 Íqlım" kitap orayı tárepinen sawda yarmarkası shólkemlestirildi.

Ilajda instituttıń professor-oqıtıwshıları hám student-jasları belsene qatnastı. Kórgizbede Prezident shıǵarmaların úyreniwge baylanıslı ádebiyatlar, ózbek, qaraqalpaq hám jáhán ádebiyatınıń dúrdanaları, sonday-aq, sırt el ádebiyatları, ilimiy-texnikalıq, táriyxıy, filosofiyalıq baǵdarındaǵı shıǵarmalar hám institut professor-oqıtıwshıları tárepinen jaratılǵan ilimiy basılımlar keńnen kórsetildi.

Kitapxana xızmetkerleri tárepinen hár bir kitap boyınsha qısqasha maǵlıwmat hám usınıslar berildi. Ilaj dawamında "7 Íqlım" kitap orayı tárepinen shólkemlestirilgen yarmarkada kitapqumarlar ózlerin qızıqtırǵan shıǵarmalardı satıp alıw imkaniyatına iye boldı.

Bul ruwxıy-aǵartıwshılıq ilaj institut jámááti hám student-jaslar arasında úlken qızıǵıwshılıq oyattı hám kitapqumarlıq mádeniyatın jáne de arttırıwǵa xızmet etti.